RSTV NEWS.Odayaasha dhaqanka ee Beelaha Muqdsiho oo soo saarey Baaq xabad joojin ah

Odayaasha dhaqanka ee Beelaha Muqdsiho oo soo saarey Baaq xabad joojin ah

War saxaafadeed ka soo baxay Beesha Hawiye, ka dib markii xiriir wada hadal uu dhex maray odayaasha dhaqanka iyo saraakiisha ciidamada shalay oo taariikhdu aheyd 31-3-07.
Iyadoo la tixgalinayo xabad joojintii dhex martay odayaasha beesha Hawiye iyo dowladda Ethiopia 22-3-07.

1-Iyadoo la tixgalinayo gumaadka, burburka, barakaca balaaran ee loo geeystay maatida iyo hantida maalmihii la soo dhaafay ayaa beesha Hawiye waxa ay isku raaceen qodobada soo socda.

2-In la joojiyo xabadda 2 da duhurnimo ee maanta taariikhduna ay tahay 1-4-07 goob kasta oo ka tirsan magaalada Muqdisho.

3-in laga sugayo dowladda Ethiopia in ay ku dhawaaqdo, isla markaana ay ilaaliso xabad joojinta sidii horey la isugu afgartay.

4-in 24 saac gudahooda la furo wada hadal si looga xaajoodo dhibaatada baaxadda leh ee ka dhalatay dagaalka iyo barakaca magaalada Muqdisho.

5-in beesha caalamka, sida deeq bixiyayaasha, hay'adaha xuquuqul insaanka, kuwa gargaarka aadamiga, gaar ahaan bisha Casa iyo Laanqeyrta cas ay la soo gaaraan gurmad deg deg ah dadka gaaraya 1.5 millyan ee ku tabaaleysan daafaha magaalada Muqdisho iyo gobolada ku hareersan isla markaana la baaro xadgudubyada xuquuqul insaanka ee ciidamada Ethiopia iyo maleeshiyaadka dowladda ay ku kaceen intii uu socday dagaalka, isla markaana waxaan codsaneynaa taageero lagu aaso meydadka laguna daweeyo dhaawacyada.

6-in ciidamada Ethiopia iyo dowladda KMG ah ay si deg deg ah u soo daayaan dadka ay sida sharci darada ah uga qabsadeen meelo kala duwan oo dalka ku yaala.

Iyadoo odayaasha Beelaha Hawiye ay soo saareen qodobadaan ayaa waxaa wali soconaya dagaalo goos goos ah, iyadoo wali la maqlayo israsaaseyn teel teel ah oo u dhaxeysa ciidamada Ethiopia iyo ragga hubeysan ee ka soo horjeeda

RSTV NEWSROOM

Newsroom@rstvonline.com