RSTV NEWS.Shirkii Dib u heshiisiinta ee dhici lahaa 16 ka bishan ayaa dib loo dhigey ilaa bisha soo socota.

Shirkii Dib u heshiisiinta ee dhici lahaa 16 ka bishan ayaa dib loo dhigey ilaa bisha soo socota.

Warar ku dhow xarunta Madaxtooyada DKMG ah ayaa laga soo xigtey in dib loo dhigey shirweynihii dib u heshiisiinta ee ka dhici lahaa Muqdisho April 16 keeda.
wararku waxay sheegayaan in shirkaasi uu dhici doono bartamaha bisha May ee inagu soo socota sababo la xiriira xaalada ammaan darro ee ka jirta caasimada Muqdisho awgood.

Sida uu qoray wargayska Alsharqal Awsat ee fadhigiisu yahay magaalada London diblumaasi carbeed ayaa sheegay in wasiirka arrimaha dibada Df Dr.Ismaaciil Hurre Buubaa uu gaarsiiyay kooxda xiriirka Soomaalida ee ku shirtay magaalada Qaahira maalintii talaadada go'aankaasi dib loogu dhigayo shirka dib u heshiisiinta, isagooku sheegey dib u dhigaasi sababo dhinaca ammaanka ah.

Ilaa hadda lama hayo war rasmi ah oo ka soo baxay Df oo xaqiijinaya ama beeninaya wararka tilmaamaya dib u dhigista shirka dib u heshiisiinta qaran ayadoo si weyn loo hadal hayo sida uu u qabsoomi karo shirka dib u heshiisiinta xilli Df aaney ka talin inta badan caasimada Muqdisho oo loo qoondeeyay shirkaasi in uu ka dhaco.

Iska Horimaadkii ka dhacay magaalada Muqdisho iyo saasaanta colaadeed ee weli ka jirta caasimada ayaa mugdi sii geliyay suurta galnimada shirka dib u heshiisiinta qaran ayadoo xarumaha Df ay bartilmaameed u yihiin kooxaha kacdoonka oo horey uga digay in aan wax shir ah lagu qaban karin caasimada Muqdisho.

RSTV NEWSROOM

Newsroom@rstvonline.com