RSTV NEWS.

Ciidamo fara badan oo la soo dhigey degaano cusub oo ka mid ah magaalada Muqdisho.

Waxaa caawa magaalada Muqdisho laga dareemayay dhaqdhaqaaqyada ciidamada dowladda Federaalka KMG ah iyo kuwa Itoobiya ay ka wadaan isgoysyada magaalada Muqdisho iyadoo gaadiidka tinikada la dhigay goobo hor leh.

Isgoyska Xararyaale oo maanta dagaal xoogan uu ka dhacay ayaa ka mid ah meelaha ciidamada la soo dhigay sidoo kale Isgoyska Siinaay ayaa lagu arkayey ciidamo fara badan oo ku hubeysan gaadiidka dagaalka kuwaasi oo kontoroolaya dadka iyo gaadiidka, sidoo kale waxaa caawa meelaha lagu soo daadiyay ciidamada ka mid ah isgoyska Sanca oo gaadiidka tiknikada iyo ciidamada dowladda ay ku sugnaayeen.

Ciidamadan cusub ayaa loo arkaa kuwo lagu xoojinayo amaanka isla markaana looga hortagayo kooxaha kasoo horjeeda dowladda in ay colaad ka abuuraan deegaanada nabdoon ee Waqooyiga magaalada Muqdisho.

Dhanka kale wararka aan ka heleyno gobolka Hiiraan ayaa waxay sheegayaan in ciidamo fara badan ay ku soo wajahan yihiin magaalada Muqdisho si ay ugu qeyb qaataan howlgalada lagu nabadeynayo caasimada Muqdisho.

Caawa magaalada Muqdisho waa ay degan tahay mana jiraan dagaal xiligan socda walow laga cabsi qabo in beri uu dib u bilowdo

Si kastaba ha ahaatee waxaa wali ka jira magaalada Muqdisho xiisado colaadeed iyo barakac ay ka barakacayaan dadka shacabka ah ee ku noolaa Magaalda Muqdisho.

RSTV NEWSROOM

Newsroom@rstvonline.com