Ganacsatada Gobolka Banaadir oo ka cabanaya canshuurta Dowladdu ku soo rogtey Dekedda Muqdisho.

Midowga Ganacsatada gobolka Banadir oo maanta shir ku yeeshay Muqdisho ayaa sheegay in ay dhibaato ku qabaan go'aanka lagu kordhiyey canshuurtii ay bixin jireen marka ay lasoo degaan Badeecooyinka.

Afhayeenka ganacsatada gobolka Banadir Cabaas Max'ed Ducaale oo u waramay warbaahinta  ayaa sheegay in kulan ay maanta yeesheen ay uga doodeen canshuuraha  dowladda KMG ah ay amartay in ay bixiyaan ganacsatada gobolada Banadir, taasoo wax weyn ka duwan tii horey looga qaadi jirey.

Ganacsatada gobolka Banadir ayaa sheegay in loorka sokorta ah horey looga qaadi jirey 1 dollar halka haatan laga qaadayo lacag dhan 3.6 dollar, taasoo uu sheegay in ay mid xad dhaaf ku ah howlahooda ganacsi.

Afhayeenka ayaa waxa uu intaasi ku daray in ganacsatada ay diyaarinayaan kulamo ay la qaataan Mas'uuliyiinta dowladda KMG ah ee Somalia si ay ugala hadlaan lacagaha canshuuraha oo ay ku sheegeen in ay tahay mid xad dhaaf ah.

Arintaan ayaa waxa ay ku soo beegmatay xilli shalay wasiirka ganacsiga dowladda KMG ah C/laahi Axmed Afrax uu ku war galiyay ganacsatada in wax weyn laga badalay lacagihii Canshuuraha horey looga qaadi jirey badeecooyinkooda, ka dib shir weyn oo ay ku yeesheen magaalada Muqdisho.

Waa markii ugu horreysey ee ganacsatada gobolka Banaadir si toos ah cabasho uga muujiyaan nidaamka Canshuurta ee waxyaabaha ay soo dajiyaan gaar ahaan alaabada ka soo degta Dekedda weyn ee Muqdisho.

RSTV NEWSROOM

Newsroom@rstvonline.com

© RSTV 2007. All Rights Reserved