RSTV NEWS.Kulan Muqdisho ku dhexmarey odayaasha dhaqanka iyo saraakiil Itoobiyaan ah oo burburey

Kulan Muqdisho ku dhexmarey odayaasha dhaqanka iyo saraakiil Itoobiyaan ah oo burburey

Kulan galabta magaalada Muqdisho ku dhex maray qaar ka tirsan beelaha Hawiye iyo saraakiisha ciidamada dowladda Itoobiya oo daba joogay kulan hore ayaa mira dhal noqon waayay.

Kulankan oo ay ka soo qeybgaleen odayaasha beel ka tirsan beesha Hawiye iyo Saraakiil ka socotay ciidamada Itoobiya ayaa waxaa ay sheegeen saraakiishii Itoobiyaanka ee kulankaasi ka qeybgalay in ay ka noqdeen qorshihii hore ee heshiiskii Khamiistii isla gaareen odayaashan waxayna saraakiishu ay sheegeen in howlo guri guri lagu baarayo ay ka bilaabayaan magaalada Muqdisho.

Axmed Diirire oo ah afhayeenka odayaashan sheegta beelaha Hawiye ayaa waxaa uu sheegay in saraakiisha Itoobiya ay ku qanci weyday heshiiskii horay ay u wada gaareen ee ahaa in xabada la joojiyo lana kala qaado ciidamada, wuxuuna Axmed Diiriye uu sheegay in ay ku adkeysteeen Itoobiya in guri walba oo magaalada Muqdisho ay baarayaan, walow saraakiisha ciidamada Itoobiya aysan sheegin xiliga howlgalkaasi bilaabanaya.

Saraakiisha Ciidamada Itoobiya ayaa waxay sheegeen in ay ku qanci waayeen howlaha iyo falalka maliishiyooyinka beelaha ay wada hadalka la galeen ay ka wadaan, waxayna sheegeen in howlgalada ay fulinayaan aysan cidna ka heybasaneyn oo ay fulinayaan.

Odayaasha beelaha qaarkood ayaa ka biyo diiday howlgaladaasi waxayna sheegeen in aysan aqbaleyn arrimaha la isku hayana ay yihiin arimo siyaasadeed.

Kulankan oo ah kuu labaad ayaa natiijo la'aan ku dhamaaday iyadoo la filayo howlgal ay ciidamada Itoobiya ka bilaabaan magaalada Muqdisho saacadaha soo socda.

RSTV NEWSROOM

Newsroom@rstvonline.com