Dooni ah nooca dalxiiska oo fransiisku leeyahay ayaa lagu qafaashey xeebaha Soomaali.

Dooni ah nooca ay raacaan dadka dalxiisayasha ah lagana leeyahay dalka Faransiiska ayaa la sheegey in lagu afduubey meel u dhaxaysa Yemen iyo Somaliya.

Doonidan oo lagu magacaabo the Ponant waxaa ay ka timid dhinaca Jasiiradda Seychelles waxaana saarnaa oo kaliya dadkii ka shaqeynayey oo tiradoodu gaareysay 29 ruux.

Ciidamada Faransiiska ee ku sugan waddanka Djibouti ayaa la sheegey inay si aad u dhow ula soconayaan xaaladda markabkaas iyo shaqaalaha saaran waxaana ay halkaasi u dirayaan diyaaradaha qumaatiga u kaca iyo doonyaha dheereeya.

Wasaaradda arrimaha dibadda ee faransiiska ayaa laga sheegey inay dadaal u galeyso sidii loo badbaadin lahaa dadka la qafaashey oo intooda badani ay u dhasheen dalka Faransiiska.

Xafiiska R/wasaaraha Farasiiska ayaa sidoo kale waxaa laga soo saarey hadal qoraal ah waxaana lagu sheegey qoraalkaasi in dalka Faransiisku uu la kaashan doono sii deynta dadkaasi dhamaan dalalka ay xulafada yihiin waxaana la sheegey in shaqaalahaasi la sugayo ama lala soconayo arrimahooda iyo hadba wixii ku soo kordha.

Maxamed Yare

RSTV NEWSROOM

Newsroom@rstvonline.com

13432093

© RSTV 2008. All Rights Reserved