Lacagta Duugga ah oo lagu heshiiyey in laga qaato  magaalada Muqdisho

shir aad u  balaaran oo maanta ay isugu yimaadeen ganacsatada Suuqa Bakaaraha iyo odayaasha iyo Culimada diinta ee ku dhaqan magaalada Muqdisho, ayaa waxaa lagaga doodey sidii loo meel marin lahaa lacagaha duugga ah ama jeexjeexan oo beryahan uu ka taagnaa muran weyn.

Shirkaasi  markii uu soo afxirmey ayaa waxaa warbaahinta hadal siiyey nin ka mid ah dadka ka ganacsada Suuqa weynaha Bakaaraha ninkaasi oo lagu magacaabo Maxamed Cali Geedi, ayaa sheegay in kulanka lagu go'aamiyay in la qaato lacagaha duugga ah iyo waliba kuwa jeexjeexan oo aan maalmahan ka socon jirin inta badan magaalada Muqdisho iyo meelo kale oo ka mid ah Soomaaliya.

Sidoo kale  waxaa halkaasi hadallo  ka jeediyay qaar ka mid ah dadkii kulankaasi ka qeyb galey oo isugu jira culimada Diinta Abwaanno iyo Odayaal ka tirsan wax garadka magaalada Muqdisho waxaaney dhamaantood ku baaqeen in la qaato lacagahaasi si loo joojiyo dhibaatada ka dhalan karta haddii la diido lacagaha waxaaney ka digeen in diidmada lacaguhu ay horseedi karto waxyaabo badan oo aan dan u ahayn nolosha dadka ku dhaqan addanka Soomaaliya oo dhan.

Maalmihii ugu dambeeye waxaa ka jirey meelo badan oo ka mid ah koonfurta Soomaaliya khilaaf ka dhashey lacagaha duugga ah iyo midda jeex-jeexan gaar ahaan 1000ka shilin, waxaana loo tiranayaa inay arrintaasi keentey sicir barar ku yimid wax yaabihii ay dadku ku noolaayeen.
 

RSTV NEWSROOM

Newsroom@rstvonline.com

13432093

© RSTV 2008. All Rights Reserved