Xusuus loo sameynayo wariyeyaashiii hal sano ka ahor ku geeriyoodey Shabeelaha Dhexe

Magaalada Jowhar ayaan wali ka go’in xusuusta Geeridii Wariyeyaashii Idaacada Jowhar u shaqeynayay, iyadoona Hal sano ka soo wareegatay geeridoodii Wariyeyaasha Abshir Cali Gabre iyo Axmed Xasan Mahad, kuwaasoo la dilay, xilli ay howlahooda shaqo gudanayeen.
Waxay ahaayeen labo nin oo niyadayda marna ilaabi doonin, waxay ahaayeen rag aan hal waddo ku wada soconay taas oo ay ahayd in Soomaaliya laga dhaqan geliyo Saxaafadda Xorta ah, xusuusta reer Jowhar iyo Xusuustayda gaarka ah labadaba marna ma ilaawi doonaan shaqsiyada raggaas geeriyoodeen 15-kii May sanadkii 2007 da.

Abshir Cali Gabre iyo Axmed Xasan Mahad, Labada Wariye waxay dadka Reer Jowhar ku xusuustaan waxqabadkooda taariikhda leh ee ay muujiyeen mudadii Ifka ay joogeen, taa ayaa keentay in Sanad kasta la xusuusto Wariyaashaas oo gacan ka gardaran dishay.

Allaha U Naxariiste waxay ka tageen Labo arrimood, mida koowaad waxay abuureen dhalinyaro kuwaas oo hadda ka dhex muuqda Saxaafadda Soomaliya, waxay kaloo Bulshada u sameeyeen barashada adeeg caafimaad oo mid ka mid ah raggaas aqoon u lahaa, waana Abshir Gabre.

Macalinku ma dhinto, waayo wax buu ka tagaa, waxay ka tageen aqoontooda oo dad badan qiimo u lahayd, taas ayaana keenta mar kasta in la xusuusto raggaas.

Dhageystayaasha Idaacadda Jowhar, marka ay Idaacadda Hawada soo gasho ama ay maqlaan Barnaamijadii ragaas lagu yiqiinay waxay soo hadal qaadan magacyada Labadaas Wariye.

Haddii aan mid mid u soo qaato Labada Wariye aan ku hormaro Gabre wuxuu ku dhashay Magaalada Muqdisho sanadkii 1973-dii waxaa lagu xusuustaa Barnaamijkii Caafimaadka ee Idaacadda Jowhar ka bixi jiray iyo Barnaamijo uu ka mid ahaa Barnaamijka Faaqidaada wararka Soomaaliya, labadaas Barnaamijo dad fara badan ayaa ku taxnaa.

Wuxuu ahaa nin inta badan igu dhiira gelin jiray Barnaamijyadii aan ka daadihin jiray Idaacada, sidoo kale waxaan iskala shaqeyn jirnay Website-kii la oran jiray Guulane.com ee ku hadli jiray Afka Maamulka G/Sh/Dhexe.

Wuxuu ahaa Wariye ugaga soo warami Idaacada Jowhar Magaalada Marka oo howle shaqo ka hayay, wuxuu abuuray nidaam Idaacadda ku talaabsatay horumar kadib markii uu noqday ninkii ugu horeeyay oo Warka ku baxa Idaacadda geliya Web site-ka, in kastoo uusan Abshir ka mid ahayn raggii aasaasay Idaacadas haddana wuxuu ku soo kordhiyay Idaacaddaas barnaamijo kala duwan, wuxuu Abshir Allaha u naxariisto ifka kaga tagay Xaas iyo Labo caruur.

Axmed Xasan Mahad, waxaa uu dhashay 1981 dii isagoo ku dhashay Magaalada Jowhar, waxaa uu ka mid ahaa dhalinyaradii aas aastay Idaacadda Jowhar, waxaa uu ahaa nin aad u firfircoon oo dadaal badan lahaa, wuxuu Dugsiga Hoose dhexe iyo sare uga baxay Schoolka Intersos ee Magaalada Jowhar, wuxuu if ka kaga tagay Xaas iyo Labo Caruur.

Waxaan si gaar ah ugu xusuustaa howlo badan oo aan wadaagnay oo dhinaca Saxaafadda, waxaan wada galnay Safaro shaqo oo aynu ku tagnay Gobolada dalka qaarkood, tusaale ahaan waxaan aniga iyo isagaba ka mid ahayn Wariyaashii tagay Baydhabo sanadkii 2006 dii Bishii Febarayo markii uu halkaas ka furmayay kala fadhigii Baarlamaanka, anagoo ka mid aheyn Wafdigii Baarlamaanka qeybta Jowhar fadhiday ee ka ambabaxday Garoonka Diyaaradaha Magaalada Jowhar.

Axmed waxaan si gaar ah ugu xusuustaa Kaftankii iyo sheekadiisa, waliba intii aan joognay Baydhabo, xilligaasoo aan Hal qol wada degneyn.

Labada wariye waxay dhinteen iyagoo ku gudi jiray howlahooda shaqo, waxay ka mid ahaayeen Wafdi Guddoomiyaha Maamulka Gobolka Shabeellaha Dhexe kuwaas oo socdaal ku marayay degmooyinka Gobolkaas balse nasiib daro waxa dhacay wax cid kasta sugayso taas oo ay ahayd geerada labada Wariye kadib markii ay ku dhex dhaceen xaalad colaadeed oo labo beel oo wada dega Gobolkaas ka dhex taagnayd.

Meydadka Labadaas Wariye si xun ayaa loola dhaqmay, waxaa mid ka mid ah korkiisa ka muuqday calaamado Mindiyo u ek, way dhinteen waxayna tageen gurigooda runta ah, laakiin waxaa loo baahan yahay in cadaalada la horkeeno kuwii falkaas ka dambeeyay.

Aqoonyahano reer Jowhar ah waxay ku talinayaan in la furo astaamo lagu soo xusuusto wariyaashaas, sida Dugsiyo Waxbarasho iyo hay’ado u dooda Xuquuqda Aadanaha.

Si kastaba ahaatee Marxuumiintan waxay ahaayeen dad aysan marnaba ilaawi doonin Shacabka ku dhaqan Magaalada Jowhar, iyadoona geeridooda si isku mid ah looga damqaday deegaano ka mid ah Gobolka Shabellaha Dhexe

 

Source:SM

RSTV NEWSROOM

Newsroom@rstvonline.com

13432093

© RSTV 2008. All Rights Reserved